Ayel mañana Miajás omenageó al poeta más sonau dela literatura en estremeñu: J. Ma. Gabriel y Galán. L'Associación Coltural Pablo Gonzálvez celebró un recital i se hizu la entriega de premius al certamin poéticu.
El actu prencipió alas 12:00 corrías ena casa de Juani Blázquez, ena calli Gabriel y Galán, sigún se vien hiziendu dendi ai varius añus. Miajaeñus, recitaoris de Orellana o el Montiju, assina comu la televisión de Miajás.
 |
| La genti prencipia a allegal |
 |
| Aspera de que emprencipii |
Juani Blázquez abrió las puertas dela su casa un otru añu más pa acogel el recitaeru más sonau del puebru, el que aprepara l'associación Pablo Gonzálvez. En llegandu la meiudía prencipia a acuíl la genti dipuesta a echal una mañana llena de versus en estremeñu de poetas consagraus o localis. Las camaras de RTV Miajadas recadó tó el actu i entrevistó alos presientis delas associacionis assestentis, Bienvenido i Ismael.
 |
| Casa andi se celebró el recital |
Bienvenido Gutierro, pairi, regaló un raminu de froris al'ama dela casa en seña de agraecimientu por dexal que se puea celebral ena su casa esti omenagi, ya que es un sitiu bien aparenti drentu dela calli Gabriel y Galán.
 |
| Agraecimientus a Juani Blázquez |
Densiguía el concejal de coltura del ayuntamientu de Miajás endilgó unas palabrinas que sirvierun de inaguración al actu.
 |
| El concejal de coltura del ayuntamientu a inagural el actu |
Bienvenido Gutierro Cuadrado entroduxu el omenagi assentandu el ordin de aparecimientu delos participantis.
 |
| Bienvenido Gutierro iju a entroducil el recital |
Bienvenido presentó a Ismael Carmona quien echó una palabrinas que se recordavan dela obra de Gabriel y Galán i dela demás literatura en estremeñu, agraeciendu la convidá i dandu un vencijón alos recitaoris i participantis que allí s'ajuntarun.
 |
Ismael Carmona a echal una palabras en estremeñu a tentu dela nuestra literatura (retratu
© RTV Miajadas) |
El primeru en recital hue Jaime Sánchez Masa quien conos sus ochu añinus prenunció el Fandango Extremeño con muchu arziu.
 |
| Jaime Sánchez Masa a recital |
Dispués, ya en el atril, Javier Borrallo Mayoral recitó el Sibarita causandu el espasmu delos más veteranus en custionis del recitamientu.
 |
| Javier Borrallo Mayoral i el Sibarita |
Benjamín Mayoral Herrero leyó una pequeña entrodución a tentu del origin dela lengua estremeña i recitó Porque semos estremeños de Javier Feijóo.
 |
| Benjamín Mayoral |
Ena puerta l'associación pusu un cachuju de libreta pala genti dil apontandu palabras estremeñas, recadandu-si palabras de Miajás, Logrosán o La Puebla.
 |
| Arrellenandu palabras |
Demientras, el atril lo acupó Rosa Méndez Gómez quien recitó la linda poesía Cóhilu, niña.
 |
| Rosa a recital |
Patricio Morales Gómez, d'Orellana, vinu a recital varias poesía con vos rezia i sentimientu. El primel entrevenimientu hue con Mi tierra i Teresa.
 |
| Patricio a recital |
La collera de M. Ángeles Pintado, hateá cona chambra i el pañuelu, i Rita Leandro entrepetarun La Suegra que alevantó un grandi aplausu polos assestentis.
 |
| M. Ángeles i Rita |
 |
| Juan José a recital |
Arremató la primel ronda Juan José Martínez, del Montiju, quien sobrecogió al púbricu con el su sentimientu i la entrepetación delos versus gravielanus.
 |
| Patricio |
Uvu una segunda ronda de recitalis andi participarun los más veteranus i professonalis, con poesías en estremeñu, asseñalandu la d'El Jubilau de Rita Leandro o La nacencia de Chamizo.
 |
| Juan José |
 |
| Rita a echal una poesía d'ella |
P'arrematal el actu, l'associación coltural Pablo Gonzálvez entregarun dos diplomas i librus alas dos huturas promessas del estremeñu, Jaime Sánchez i Javier Borrallo. Muchu ánimu, zagalis!
 |
Diploma pa Jaime Sánchez (© RTV Miajadas)
|
 |
| Diploma i libru Javier Borrallo |
Por últimu, se fallarun los premius del certamin Gabriel y Galán de poesía, siendu esta la resultancia:
Un accesit ala poesía El palral dela mi genti de Cruz Díaz Marcos.
3u premiu ala poesía Buscu trebaju de Esmeralda Carroza García.
2u premiu pa Mi jamón de Filomena Tardío Izquierdo.
1u premiu pala poesía Defendiendu el estremeñu de Cruz Díaz Marcos.
Dendi aquí, norabuena alos ganaoris i que sigana escrevil enas nuestras letras!
Tristimenti no púun assestil a arrecogel los premius i a leel las poesías, polo que angunus voluntarius salierun a leel las pieças premiás.
 |
| Ismael recitandu el poema con accesit |
 |
| Bienvenido a leel el tercel premiu |
 |
| M. Ángeles a leel el segundu premiu |
 |
| Juan José a recital el primel premiu |
Estus eventus premitin ajuntal a aficionaus alas letras en estremeñu conos más nuevus que están prencipiandu a enseñal-si a recital i mesmu a escrevil. Angunus delos que acuyerun son poetas que escrivin en estremeñu, delos que ala contra duna literatura que aborreci lo menuíu, sin embargu, son escapazis de emocional a quien los ascuchan ena su propia lengua. Se trata duna celebración emprecidibli pa poel entendel el trebaju social que tienin las associacionis colturalis i de sostribu alas letras provincias.
