Páginas

martes, 28 de noviembre de 2017

Omenagi a LUIS CHAMIÇU en Caçris.

Letreru anunciaol del omenagi, versión estremeñu.
Esti SÁBAU 25 acaberu del mesi de NOBRIEMBRI dendi las dozi dela meyodía acuimus ala enaguración del menumentu i el letreru en omenagi al pueta Luis Chamiçu ena praça del mesmu nombri enxiestá enmeyu 'l barriu San Bras, ena cidá de Caçris.
En hatu estremeñu i hiziendu un afotu al menumentu.
Huerun organizaoris del autu el Conceju de Caçris (of. Ayuntamiento de Cáceres) i el nuestru Órganu OSCEC, i acorrierun comu calavoraoris del rehuiju la Asociación de Vecinos de San Blas i la corrobra musical Amanecer Extremeño de Moraleja, que acompañó colos sus descantis estremeñus.
Letreru n' estremeñu pala Praça de Luis Chamiçu nel barriu San Bras de Caçris.
Pola parti menucipal parteciparun los Concejalis de Segurança Cidadana, Rafael Mateos, i de Coltura, Laureano León. Tamién assestierun el Cronista Oficial de Cáceres, Fernando Jiménez Berrocal, i l' autol dela Biblioteca Virtual Extremeña, Manuel Trinidad, que endonó una palramenta a tentu la vida i huéyebra del pueta de Guareña.
Autoridais menucipalis i biembrus del OSCEC nel omenagi al Chamiçu.
El menumentu hue apreparau pola Nuversidá Populal de Caçris (of. Universidad Popular de Cáceres) i estava hormau por un librinu con versus del puema La Nacencia, unu delos mas nombraus del Chamiçu, i una praca col nombri dela praça, dambus dos hechus de hierru i espetaus porcima dun poyu granitu.
Rezitaol de puesía estremeña junta' l menumentu.
Acontinó l' autu col rezitaeru de puesías n' estremeñu del mesmu Chamiçu i sotrus autoris, que hizun angunus delos assestentis.
Rezitaora de puesía n' estremeñu junta 'l menumentu.
Entri ellus, el nuestru collaçu Cruz Díaz Marcos, que tamién aguró la próssima pubricación del su primel libru de puesía n' estremeñu.
El Crus Días a rezital una delas sus puesías en lengua estremeña.
Entri ellus, tamién, Javier Feijoo, el nombrau pueta de Badajós i reconocíu rezitaol del Chamiçu, aziamenti el mas téntigu acontinaol dela palra i del estilu chamicianus uguañu, que endilgó alos presentis esta sentía entrepetación duna puesía propria:


Arremató la hunción cola música dela corrobra musical Amanecer Extremeño de Moraleja, pal envaimientu dela genti que pallí queavamus, i cola convidá a migas, vinu pitarra i ducis pola Asociación de Vecinos de San Blas a quien agralecemus abondu la su calavoración i güen geitu pal arrehundimientu del omenagi a Luis Chamiçu, liqueamenti unu delos esmençaoris con mas reconocencia dela literatura n' estremeñu.
La corrobra Amanecer Extremeño de Moraleja a tocal i cantal, col nuestru collaçu Crus Días ala cordión.


No hay comentarios:

Publicar un comentario